Kuni kecha Osiyo Fanlar akademiyasining birinchi akademiklari va muxbir a’zolarining saylovlari bo‘lib o‘tdi. Ushbu ajoyib voqea Osiyoning yagona akademik va intellektual makonini (OAIS) yaratish yo‘lidagi kata qadamning boshlanishini anglatadi.
Bosh Assambleyada turli mamlakatlardan 121 delegat ishtirok etdi, jumladan: Xitoy; Rossiya (Tatariston Respublikasi, Checheniston Respublikasi, Dog'iston Respublikasi va Boshqirdiston Respublikasi vakillari bilan); Hindiston; Yaponiya; Turkiya; Ozarbayjon; Gruziya; Qozog‘iston; Tojikiston; O‘zbekiston; Qirgʻiziston; Pokiston; shuningdek, AQSh; Fransiya; Gretsiya; Moldova; va Belarus.
Bosh assambleya yig‘ilishida Akademiya rahbariyati, jumladan, prezident va vitse-prezidentlar, bosh kotib va Prezidium aʼzolari, Ilmiy kengash rais oʻrinbosarlari, qoʻmita raislari va ilmiy boʻlimlar rahbarlari saylandi. Assambleya Akademiyaning haqiqiy aʼzolari (akademiklar), muxbir aʼzolar va institutsional aʼzolarini saylashni maʼqulladi.
Taniqli xitoylik va ozarbayjonlik olim Elchin Xalilov Osiyo Fanlar akademiyasining prezidenti etib saylandi.
Osiyoning turli mamlakatlaridan taniqli olimlar, jumladan, O‘zR FA prezidenti, akademik Shavkat Ayupov Osiyo Fanlar akademiyasining vitse-prezidenti etib saylandi.
.jpg)
.jpg)
Vitse-prezidentlar qatorida Ozarbayjon, Gruziya, Tojikiston, Qirg‘iziston, Xitoy, Pokiston, Rossiya davlatlaridan taniqli davlat va jamoat arboblari, olimlar o‘rin olgan.
Shuningdek, Toshkent davlat iqtisodiyot universiteti rektori, professor To'lqin Teshaboyev Ilmiy kengashi a'zosi, Fanlar akademiyasi akademigi Qodir Gulyamov Prezidium a'zosi sifatida saylandi.
O'zbekistonlik olimlarning bu kabi xalqaro miqyosda e'tirof etilishi mamlakatimiz ilm-fanida, olimlarimiz faoliyatida mintaqaviy hamkorlikning yangi bosqichini boshlab beradi. Mazkur jarayon Osiyo davlatlarining ilmiy salohiyatini birlashtirish, umumiy ilmiy yo‘nalishlarni belgilash, qo‘shma tadqiqotlar va xalqaro integratsiyani kuchaytirish uchun mustahkam asos yaratadi.
Ma'lumot o'rnida: 2025-yil 12-avgustda bosh qarorgohi Gonkongda joylashgan Osiyo Fanlar akademiyasi birinchi marta Xitoyda rasman ro‘yxatdan o‘tkazildi. Shu bilan Osiyo Fanlar akademiyasi xalqaro notijorat tashkilot maqomiga ega bo‘ldi.
