Joriy yil Buxoro viloyatining Qorakoʼl va Olot tumanlarida sodir boʼlgan kuchli shamol va Sirdaryo viloyatining Sardoba tumanidagi suv ombori yorilishi natijasida yuz bergan suv toshqini nafaqat insonlar, qishloq xoʼjaligi ekinlari, chorva mollari, balki flora va faunaga ham jiddiy zarar yetkazdi. Shu boisdan OʼzR FА Botanika instituti tomonidan mazkur hududlar tabiiy oʼsimliklar qoplamida sodir boʼlgan inqiroz darajasini aniqlash va suv eroziyasi oqibatida hosil boʼlgan yalangliklarda innovatsion texnologiyalar yordamida tabiiy oʼsimlik qoplamini tiklashga qaratilgan “Oʼzbekistonning tabiiy ofatdan aziyat chekkan rayonlari tabiiy oʼsimliklar qoplamining inqiroz darajasini baholash va uni qayta tiklashning innovatsion usullarini joriy etish”, shuningdek, FА Zoologiya instituti olimlari tomonidan “Buxoro vohasi hayvonot olamiga tabiiy hodisaning yetkazgan zararini tahlil qilish va ularning hayot faoliyatlarini tiklash boʼyicha tadbirlar ishlab chiqish” hamda “Sirdaryo viloyatining tabiiy ofat yuz bergan joylarida anofelogen suv havzalarini aniqlash boʼyicha aholi yashash hududlarini monitoring qilish, ularning hudud aholisi salomatligiga salbiy taʼsiri va ularni keskin kamaytirish choralarini bashorat qilish” nomli loyihalarni ishlab chiqildi hamda OʼzR Innovatsion vazirligi tanlovida ishtirok etish uchun taqdim qilindi.
Shuni ta`kidlash lozimki, Buxoro viloyati faunasi tarkibida umurtqali hayvonlar 416 koʼproq turdan iborat, shulardan amfibiyalar 2 tur, sudralib yuruvchilar – 32, qushlar – 338, sutemizuvchilar – 44. Oʼrganish rejalashtirilgan hududda quriqlikda yashovchi umurtqali hayvonlarning alohida muhofazaga olingan 60 turi uchraydi va ularning 6 turi reptiliyalar, 46 turi qushlar, 8 turi sutemizuvchilar boʼlib Oʼzbekiston Respublikasi Qizil kitobiga kiritilgan. Viloyat chegarasida Qizilqum davlat qoʼriqxonasi, “Jayron” Buxoro ixtisoslashgan pitomnigi mavjud. Dengizkoʼl xalqaro va milliy ahamiyatga ega tabiatni muhofaza qilish zonasi hisoblanadi.
Ushbu loyihalar tabiiy ofatlar natijasida oʼsimlik va hayvonot olamiga yetgan zararni yangi innovatsion yondoshuvlar asosida qayta tiklashga qaratilgan.
